الشهامه راحت فييييييييين؟؟؟!!

رمضان كريم...وخلاص الواحد حاسس ان رمضان بيعدي بسرعه بجد ربنا يغفرلنا ويرحمنا في الشهر المفترج ده.... امبارح كنت في سبوع احد افراد العائلة الكريمه عقبال عندكو جميعا جميعا كده وتفرحو بولاد ولادكو...المهم رحت مواصلات ورجعت مواصلات وعلى الرغم من اني حااافظه الخط ده لاني بروحه بقالي 3سنين عشان الجامعه بس اول مره يكون في ضرب نار في المواصلات وماأبقاش عارفه ارجع يعني غالبا لو حصل ولقيت زحمه بروح راجعه مكان ما كنت وابقى امشي بكره مفيش مشاكل خالص...المرادي كان معايا اطفال وكنا كتير ولازم نمشي مينفعش نرجع ابداا والدنيا زحمممممه ومفيش ميكروباصاات خاااااااااااااااالص وقلنا شكلنا هنسهر هنا النهرده ومن الساعه 10ونص تقريبا لحد 11ونص مفيش ولا عربيه جت واخييييرا ميكوراص العاااشر اجري يا جدعععع المهم اخواتي الشباب ربنا يخليهم جريو وحجزلنا مكاان لاننا كنا 6ماشاء الله فكان لازم على الاقل كنبتين عشان نعرف نقعد والناس طبعا مش هتخلي حد يحجز كنبتين واللي يدخل عياله من الشباك واللي ييزق واللي يشتم وبجد كان منظر رهييب المهم ان كان في ستاات غيرنا والناس تقول ركبو الحريم يا جماعه ومفيش كإن محدش بيتكلم اصلاااا المهم لحقنا بالعافيه كنبه وحده وست ياعيني معاها طفلين دخلت وركبت جالها راجل يقولها انا مركب ولادي من الشباك وهقعد جنبهم تقوله خلاص نساعي بعض يقولها لا وانزي انزلي ويزعق ويشخط لحد ما الست نزلت يا عيني بالعيلين اللي معها ....استفزني لدرجه اني رديت عليه قلتله يعني حضرتك راجل وعايز تنزل ست ومعاها اولاد تستنى في الشارع عشان حضرتك مش عايز تزنق نفسك؟؟؟ قال ما انا كمان معايا اطفال ! والناس تقوله معلش وساعو بعض ودا ابداااااا مبيحسش ولا عندو ذره شهامه والناس ساع وبعض واخدوها جنبهم وكل واحد شال عيل على رجله وانا واللي معايا قعدنا فوق بعض على كنبه وحده وواحد من اخواتي قلتله استنى انت بقى الميكروباص اللي بعدو عشان نوسع مكان للست والراجل وولاده التلاته الصغيرين اللي اكبر عيل فيهم10سنين واخدين كنبه لوحدهم ومرتاحين جدا وكل الناس عماله تلبقح بالكلام وهو ولاكإنه سامع اصلاااا ॥والكل بقى عمال ينفخ ومش طايقي نكلمه لبعض ومحدش راضي يجمع الاجره واللي له باقي يتذل عشان ياخده والسواق اصلا كان عمال يبيع ويشتري فيها وبجد حمدت ربنا اننا وصلنا بالسلامه واخويا طبعا ملقاش مواصلات وبات عند عمي اللي كان بايت عنده ناس اصلااا بس الحمد لله وصل سليم تاني يوم.. .استغربت بجد ان في ناس ممكن تكون فقدت شهامتها بالشكل ده وممكن اوي ينزل ست من الميكروباص الساعه 12ولا حاجه ومش مهم تقف ها في الشارع بس المهم يرتاح هو في المواصلات!! العجيب بقى انها قعدت تدعي عليه تقوله يارب ما توصل بعد ما نزلها بس هي ركبت تاني بقيت خايفه موووت احسن فعلا ميوصلش وكلنا منوصلش معاه ههههههه وضاعت الشهامه يا مصر... رمضان كريم

رمضان السنادي....غير

كل سنة وانتو طيبين...ورمضان كريم على الجميع السنادي رمضان غير عن الخمس سنين اللي فاتو ومن خمس سنين كان غير عن ال18سنه الي عدو من عمري:) اول رمضان للاسره في مصر من زمااااااان واول رمضان معاهم من خمس سنين। السنادي رمضان بالنسبالي لمّة وعيلة واهل وعزومات عندنا احنا في بيتنا مش عند الناس وفرد جديد وحياه جديده...كان بقالنا كتييير اوي مفطرناش في بيتنا عشان بنصعب على الناس لاننا لوحدنا:) والسنادي بس مش هنصعب عليهم وهيجو يفطرو هما عندنا... سمعت ان الصحابه كانو بيركزو في رمضان على 3دعاوي بس يعني طول رمضان بيدعو بيهم ومبيجيش رمضان اللي بعده إلا ويكونو اتحققو وبدأو يدعو ب3دعاوي تانيين وبجد لقيتها فكره رائعه ناس عندها ايمان تام وعقيده رهيبه ان الدعوة هتتحقق اكيد وان ربنا هيستجيب ليهم ولانهم بيدعو بجد وبيخلصو النيه وبياخدو بالاسباب فاكيد ربنا هيستجيب حتى لو بشكل غير مباشر...ولقيتها فكره حلوة اننا نحاول نقتدي بالصحابه وندعي بجد من قلبنا 3دعاوي كل واحد ينقي 3دعاوي محتاجهم اوي ونفسو فيهم اوي ويحاول يعمل كل اللي يقدر عليه عشان يتحققو واعرف ان الواحد لما يدعي يدعي بالكثير او زي ما بيقولو ان عشقت اعشق قمر وان سرقت اسرق جمل هو طبعا مثل ملوش علاقه بالكلام بس جه في بالي يعني لما ندعي يارب انجح مفيش مانع لما اقول يارب انجح بتفوق ايه المشكله؟ خلي ايمانك بربنا كبير بس دون تفصيل يعني مش يارب اجيب مادتين امتياز وتلاته جيد جدا وواحده جيد اعرف ان التفصيل مكروه بس خلينا ندعي بجد وبقلب جامد ونحاول ويكون رمضان السنادي جديد في كل شيء نحاول ننقي قلوبنا ونجتهد في العباده وننسى شويه القسوة والغيبه والنميمه والزعل والكراهيه والحقد والمسلسلات والحاجات اللي ملهاش لزمه...يارب يكون شهر مليان بركه وخير وفرح على قلوب كل الناس ويارب نقدر نحقق فيه شويه طاعات تعينا على اخرتنا ويارب يرحم موتانا كلهم ويشفي مرضانا كلهم ويغفرلنا يالا كل واحد يحدد دعاويه التلاته....وربنا يدينا العمر ونيجي السنه الجايه نقول انهم اتحققو خلاص:)

:) فرررررررررح :)

ياااااااااااااه الحمد لله اخيييرا فرح في بيتنا... فرح بلال اخوووويااا اعز اخواتي اكتر واحد عشت معاه في اخواتي كلهم مش غريبة عشان انا وهو هنا لوحدنا بقالنا خمس سنين انا وهو بس وكمان عشان هو الكبير يعني هههههههه بجد اتعلقت بيه اوي وفي اخر الفرح مقدرتش امسك نفسي من العياط مع اني كنت خايفه على المكياج اللي اول مره احطه بس عيطت...ومع انه مش رايح بعيد شقته في الدور اللي فوقينا على طول...بس بجد حسيت انه خلاص بقى حد تاني... فرحت بالفستان اللي بديل وكل الناس داست عليه وفرحت بالزحمه والربكه والناس والحنه والاغاني القديييمه والرقص والفرحه اللي في عيون الناس كلها والتعب اللي قتلني حتى التعب فرحت بيه وفرش العروسه والطرحه انزلي اشتريها من العتبه ومتنسيش المروحه الرييش والمشاوير اللي اتمشورتها حتى وانا تعبانه اوي وايمااان كل 3ثواني من اي حد وكل حد والنيو لوك اللي عملته وكل الناس معرفونيش هههههههههه وصحابي اللي جم ووقفو جنبي واللي بجد مسابونيش ولا لحظه واللي وقفت تلف طرح ليجي 10افراد متعرفش فيهم غيري ولمة الاهل والصحاب والناس والفرح ال300فرد اللي معرفناش اننا نعرف كل الناس دي غير في الفرح:):) والاكل اللي مدقتش منه حااااااااااجه والتورته اللي كان نفسي فيها ومدوقتهاش ورجلي اللي محستش بيها من اول ساعه في الفرح والكعب ال15سنتييي اللي منفعش وبردو قصيره واخواتي وبدلهم وحسيت اني عزوه كده وسطهم وحاجات كتييييير المهم في الموضوع الفرح...اننا عندنا فرح عقبال الجميع يارب ويبارك لبلال فيها ويباركلها فيه ويسعد قلوبهم ويوفقهم ديما وبجد فرحاااااااااااااااااااااانة انا اخت العرييييييييييييييييييس :):):))

سنة اولى تدوين....

ياااه يوم 15\6من سنه بالضبط اول موضوع نزل في المدونه :) لسه كنت بقول انا بدأت تدوين في شهر 6 المفروض اعمل عيد ميلاد رغم كم المشااغل اللي وراييا دخلت وقريت كوول التدويانت القديمه في المدونه اللي راحت وهنا كمان....يااه على اللي حسيته وعلى الكلام والفعكشه والردود وكل حاجه حسيت ان اللي عدى مش سنه لاا دا عمرررر بحاله واحساس جه واحساس راح وايام سوده وايام فرحانه وايام كلها امل وبجد متصورتش ولا جه في تفكريني اني هكمل تدوين خااالص انا قلت اخري هكتب شهرين تلاته الشهرين كملو ل12شهر ولسه باكتب والحمد لله :) حبيت اقول لنفسي كل سنه وانا طيبة....وكل سنه وان ازي ما انا مفيش حاجه فيا بتتغير مش عارفه دا حلو ولا وحش؟ بس انا متأقلمه على كده...وحابه نفسي كده...ومقبله على الحياه اوي السنادي...يمكن يحصل تغيير او على الاقل افرح من قلبي بجد.... عقبال سنه 10تدوين واكون مدونه مشهووره وعظيمه ومعروفه واصحييييي يا ايمان بطلي احلام :):):)

ولا زال في العمر بقية...

ياااه.....منقطعه بقالي كتير اوي الحمد لله كويسه اوي والنوت اللي كنت كتباها منزلتش ورجعت سليمه الحمد لله ربنا لسه كاتبلي عمر :) وماما وبابا جم ومشيو.. لسه النهرده ماشيين ورجعنا تاني للهدوء وللوحده وللمذاكره اللي نسيتها واللي لازم اشد حيلي فيها لان الوقت اللي ضاع كتير اوي ومبقاش في وقت يضيع تاني وخلاص بقيت اقدر اقعد واذاكر .... فرحانه اوي اوي إن في ناس سألت عليا واهتمت او حست بيا من غير سبب بجد سبحان الله معرفش ازاي ممكن وحده صاحبتي تتصل تقولي مالك وهي متعرفش في ايه ومن غير سبب تقولي بدعيلك :):) والحمد لله الدعا وصل ومش عارفه ازاي ممكن حد يتبرعلك بالدم لمجرد انك تقوله عايزين دم ومن غير ما يقول لمين ولا لإيه ...إنتي محتاجه وهو عنده استعداد يديكي من غير سبب غير انه عايز يخدمك...لسه في ناس اخلاق اوي كده؟؟!!! الحمد لله انا كويسه وكل حاجه تمام التمام ولسه في العمر بقية :) غبت بقالي كتير ولسه هغيب تاني بس بادخل كل شويه اقراكم واتابع وامشي... :):) مكتبتش حاجه من زمان مع ان كل كتاباتي شخابيط بس وسط ورق المذاكره لقيت الحته دي قلت انزلها هي مش مكتوب عليها تاريخ بس شكلها من اكتر من سنه ونص ولا حاجه....استمرو في الدعاء ودعواتي لكل اللي بيمتحنو ربنا ييوفقهم

عدّى قصادي..

وقالي الكلمة..

وفاتني وماشي..!

قلت ايه؟؟

قولها تاني...

مسمعتهاش

والمصيبة...

مهيش اغاني

ولاّ كلام مرصوص

ومتزوق معاني

ولا سر حتى..

جه ووشوشني ف وداني

لكن من شفايفه...

شكل تاني

قالي...

"صباحك دا ورده

بيها الدنيا بتفتح قصادي

ويمك دا جنه..

نفسي ادخلها فثواني"

قالها....

وكان سابني وماشي

بكل البساطة اللي فعنيه

وكإنه عادي..

وهو عارف إني ديما...

بقوله تاني

ماهو مش ممكن بعقلي

استوعب كلامه

لأ وإيه...؟

وهو واقف قصادي....

شكرا....وادعولي

ياااه كانو يومين جمال اوي بجد انك تلاقي كووول الناس دي بتحبك وفاكراك وبتقولك يارب تفرح من قلبهم واهم من كده جايبنلي هدايا ههههههه لا والله حب الناس دا نعمة وساعات بيجي في وقته عشان يرجع ثقه الواحد في نفسه ॥الصحاب دول نعمة بجد انا باستغرب من الناس اللي بتبقى قاعده لوحدها في الجامعه وملهمش صحاب...الحمد لله بجد ومشغوووله مووووووووت الاسبوع الجاي ده عندي مليون حاجه ربنا يستر دعواتكم بس انا قلت اقولكم اني ممكن اغيب شويه او كتير الله اعلم باللي هيحصل لكن لو غبت اكتر من اسبوع هبعتلكم اكيد من هنا او من هناااك خالص :) اصدقاء التدوين ....دعواتكم ليا بقى..

كل سنة وانا بخير :):)

عيد ميلادي :):)

عيد تحرير سينا...

25إبريل...رفع علم مصر على ارض سينا...ومولد ايمان موافي على التوازي

انا الآنسة سينا :)

كل سنه وانا طيبه وفرحانه ومبسوطه ههههههههههه

بقيت 23سنه يااااه كتييير خالص والله الواحد شاف فيهم كتييييييييير اوي

مش عارفه اقول ايه ...ومش لاقيه حاجه اكتبها...السنه اللي فاتت بدإت كبيسه مووووت

بس الحمد لله هتنتهي ان شاء الله كويسه....

يارب يحقق احلامي...ويفرح قلبي....ويرضا عنّيي....ويجبر بخاطري

كل سنه وانا...احسن

خمس سنين

ياااااااااااااه

المدونه التانيه لقيتها؟؟؟

بكل اللي كان فيها وحتى لونها كان بهتان زي ما يكون واقع عليها تراب....

قعدت اقرا فيها كإنها من 10سنين مش كام شهر :):) وشفت نفسي قد ايه كنت محروقه ومره فرحانه ومره بداري حزني بفرحه ومره بقول كلام ميتقلش....سبحان الله بقالي كام يوم بتجيلي رسايل ربانيه كده....معرفش هي في صالحي ولا ضدي...بس بجد فرحت مووووووووووت بالمدونه مع اني مش عارفه ادمجهم ببعض بس كفايه انها موجوده...الحمد لله :):)

...........................

حلو اوييي اوي كمان انك تلاقي حد ميعرفكش اوي...وبيختارك انت بالذات عشان يحكيلك على حاجه وجعاه....يمكن لانك متعرفوش اوي فمش هيبقى محرج منك او يمكن لانك بالنسباله حد مريح ودا في حد ذاته شيء يبعث إلى السعاده بجد

واحلى اوي اوي انك تشوف نفسك في عنيهم...وتشوفهم شايفينك ازاي مش لازم يكونو شايفينك حلو بس بجد بيقولولي حاجات مش عارفاها في نفسي.....

واحلى واحلى كمان ان حد يقصدك في خدمه وهو متيقن انك هتنفذها...واحسن من ما كان هو نفسه هيعملها

ان حد شايفك سنده وظهرة دي بجد بالدنيا....

اليومي ناللي فاتو دول كان اخر معرض لمعظم صحابي في الكليه خلاص اخر سنه وماشين والكليه هتفضى عليا ...مش متخيله بجد ازاي فجأة كده كلهم يختفو وتاخدهم الدنيا ومنشفهمش تاني ومع كل اللي بنكتبه لبعض اننا هنشوف بعض وهنفضل نكلم بعض انا متأكده انهم يادوب اتنين تلاته اللي هيفتكرو بعض بعد الكلية....خمس سنين عدو مع مجموعه حلوة اوي وناس قلوبها زي الورد مع كل اللي عدى والخناقات والزعيق والعصبيه بس كونت ذكريات لما بافتكرها بادمع واقول ايام...

حلو ان ذكرياتنا تفرحنا...وتهون علينا مرار او بعد او وحده وحلو اوي لما الواحد يتخنق يطلع الموبايل ويلاقي اكتر من حد ممكن يكلمه ويفضفض معاه ويضحكه في الاخر :)

يا احلى دفعه مع اني مفضلتش معاكو كتير بس لسه صحاب واخوات .....ربنا يوفقكو في اخر ترم في الكليه ونفضل صحاب ...

حملة تجميع المصاحف للدول الفقيرة

حملة تجميع المصاحف للدول الفقيرة

الحمله دي بدأت في اسكندرية وبدأنا عندنا في جامعة الزقازيق في كلية الصيدلة وكليه الهندسة

(هدفنا تجميع000 1000مصحف )

بنجمع المصاحف الزياده في بيوتنا واللي مركونه ديما وعليها التراب ومبتتفتحش غير من رمضان لرمضان عايزين نساعد الناس اللي في الدول الفقيرة في افريقيا ونفسهم يتعلمو القرآن ؛جمعنا لحد دلوقتي اكتر من340مصحف والحمله لسه بادئنها من اسبوع بس هدفنا الميت الف مصحف وعملنا جروب للحمله دي على الفيس بوك

هو ده : حملة تجميع المصاحف للدول الفقيرة

وبنجمع المصاحف من كل حته نقدر عليها وكل ما نوصل لكميه كبيره بنبعتها لجمعية تبليغ الاسلام وهي بدورها بتبعتها للدول المحتاجه

محتاجين الثواب ده اوي ومحتاجين نعمل حاجه لاخرتنا مش كتير لما كل واحد يطلع مصحف واحد من بيتهم يوديه للجامعه عندنا في الزقايق او اسكندريه او لجمعية تبليغ الاسلام اوعلى الاقل خالص يقول للناس ويشترك في الجروب ويعمل انفيت لكل اللي يعرفهم الدال على الخير كفاعله تخيل لو بس واحد من صحابك اهتم وعمل انفيت لكل صحابه هو كمان وبعت مصاحف هتاخد اجر زيه تمام ان شاء الله

دي ارقام الناس في صيدله وهندسه الزقازيق اتصلو بس وهنوصلكم في اي حته في الزقازيق ان شاء الله :

محمد نبيل "أمين مساعد اتحاد الطلاب":0104600618

أحمد سليمان"أمين مساعد أسرة شباب اليوم"0129677578

محمد صلاح الدين "أمين جنة الاسر في كلية الهندسة":0108048544

ويارب نعرف نعمل حاجه بجد

لسه فاكرة...

عدت سنه...بالضبط...كل حاجه اتغيرت...فيّا...وحواليا..وجوايا...وبسببي...وليا...المهم انها اتغيرت

سنه حصل فيها حاجات كتيييييييييير...زي مايكون كانت مستنيه اني اكون لوحدي عشان تحصل :)

وانا اصبحت أكثر هدوءا...وايمانا...وثقة...

لكن اقل في كل شيء....في حزني...وغضبي...وعتبي....وندمي...للأسف..

حتى في شوقي..وحبي..أقل كثيرا

فاكر..ولا لحقت تنسى؟

كنت ببني معاك سنينك

أصلها كانت سنينا

والحلم اللي كنا بنحلمه

إني اكونلك ف يوم

وواكتب اسمي على الديوان

فلان..وحرمه المصون...

اللي عاشت تحبه بجنون..

...................

طيب فاكر ولادنا؟

والأسامي اللي ف خيالنا

فاكر زعيقك على تربيتهم

واللي نفسك تبقى اصلا

زي بيتنا...

وإننا لازم نكون عيله ولمه

أصلك بتحب العيال...

فاكر لما قلت يكونو عشرة

بس شرط..."يكونو شبهـِك"

وأقولك واشمعنى يعني؟؟

"عشان اشوف عنيكي جوى منهم

وماتغيبيش ابدا يا عمري"

مش عارفه ليه مش قادره انسى

حلمنا إللي ف لحظه..كان

واللي خلاص مبقاش له لزمه

شكله حلم من المحال

..................

طب عارف ايه اللي محزني؟

الدبدوب الناقص عندك...

لسه مكانه زي ما هو ف قلبي

وعارف اكتر حاجه خيفه اعملها؟

كلمة "عيني" معدتش اقولها لحد فعمري

هتقولي مكنش دا ذنبك...

هقولك عارفة..أخدت قراري

بس مكنتش اصدق ان ف ثانية

تقولّي آمين...

عارف قلت انا هأبعد ليه؟

لقيتك فجأة بتبعد...

وخطوتك مبقتش زيي

ونبرتك...قلبت تحدي

وبقيت بخاف المس اديك

وللأسف...

بقيت بخاف منك ياعمري

كنت خايفه لما تبعد

تكون سايبلي ف قلبي جرح

مش عايزه صورتك لما تمشي

يكون واصلها اي خدش..

وللأسف....

راحت مجتش !

للأسف...صحاب

زعلانه اوي...ومخنووقه موووت

احلى حاجه ان الواحد يلاقي صحاب بجد وخصوصا لما يكون بـِعـِد عن صحابه الاولانيين بسبب الكليه او الغربه او اي حاجه ويبدأ يكون صداقات تانيه....صداقات يوميه في الجامعه وناس تعرفها كويس وتروح وتيجي معاها وتعرفهم اوي ويقربو منك اوي وتقول الحمد لله عرفت اتأقلم على الوضع الجديد...وفجأة تلاقي نفسك اتخدعت ولا اتضحك عيك...او يمكن انا اللي فاهمه الصداقه غلط....؟؟؟

بجد اتخنقت من موقفهم لدرجه اني مبقتش قادره اعاتبهم واقولهم ليه كده؟؟ متخيلتش اني اكون اخر وحده تعرف ويتعمدو يخبو عني ولما يقعو في مشكله ولاّ ازمه اول وحده يجرو عليها عشان تحللهم المشكله وهي اصلا مكنتش تعرف حاجه!!!

وميكلفوش خاطرهم يقولو معلش؟؟بجد اتصدمت واتخنقت ومش عارفه اعمل معاهم ايه؟انا مقلتلهمش حاجه لحد دلوقتي ولا قادره اقولهم اني زعلانه بس باين عليا اوي اوي وبيسألوني مالك بكل براءة وبقول مفيش

مش عارفه اتأقلم على الوضع...ولا قادره اسامحهم...ولاقادره اقولهم زعلانه...

اعمل ايه؟؟!

كِتاف النَصيب

لما تقول الشعر النسائي يبقى رشا عبد الرازق...

ولما تقول شعر بجد واحساس مش عادي وقلم مميز ...

ولماتقو الواقع كإنك عايشه في قصيده

يبقى هي..الغير عاديه ابدا...رشا عبد الرازق

استمتعو...زي ما استمتعت

بَلع رِيقُــه

ودمّع دمْعتين تايهين ما بين صِدْقُــه وبين ضيقُه

وأنا جَمْبُه

ما بيني وبينُه شبرْ يا دوب ْ وكام سانتي ...!

وقاللَّي : المستحيل إِنتي !

ضحكْ

كشَّر

وِقع منِّي الكلام عَـ الأرض مليون حرف متكَــسر

لهف قلـبــُه بآهة خوفْ

وقال :حاسبي الكلام خَنْجَرْ

جرح إيدي

عيونُه الضيَّقَه تِقْدَرْ

تطيِّب جرح غالي الدَّم لو كان الكلام يـِقـْــدَرْ!

معاك منديل ؟

خالص ها

توهَوارِبْ بيه بِيبـَان قلبي وألَملــِـم ضي كان أَخضَرْ

تَلاتَهْ فِــ حِسْبِتـَكْ.... تِخْسَرْ

يا تِبقو اتنين

يا نِبقا اتنين

وراحْ سائـِل : وِصِلْـنا لِـفينْ؟

رَميتْ دَمْـعي عَلَى الشـباكْ

ورَجْعِـة صوتُه بِتفكَّرني بالعمر إللِّي فاتو هناك

وصلنا خلاص .... يا دوب شارعين

سَرَح وادَّارى في التّنْهيدْ

وشُفت الفِكرَه جمب الفكره بتشَدُّه لحد بـِعيد حرام ع الفَرْق في التّوْقيت

يـِقَرّبنا في مَعاد عدّا

وِيوْعِدْنا وِمَفيش مَواعيدْ!

سَأَلني :

طَبْ و كُنتَ أَقْدَرْ ؟ ؟

سَجَنْتْ الرَّدْ إيه يِسْوَى الكلامْ لوْ قُلْتُه مِتْأَخرْ

وحلـْم الليل ... يِموتْ بِاللِّيل

إِذا مَقْدِرْشي يِتْفَسَر

عليك ذنبي

على عُيونَك مَعَ وضوح النَّهار

ذنبي !

شافِتْني عنيك

وكان مُمْكِن تِشوف قلبي

وَجَعْتُه وٍرَجْفِةْ الفُرْقَه

بِتِدْبَحْ فيه

وبِيْخَبّي

وخُفْت عَليه

سِتارةْ رِمْشي سَرَقِتْني لِحَدْ عِنيه

وِضَمِتْني بِعذابْ: "حاضرْ

هَضُم فـِ كِبْرياءْ حُبِّك بِـطول الماضي والحاضر

وهَبْعِدْ... فيها إيه نِبْعِدْ

ما نِبْعِدْ

بَسْ مُشْ قادر !

لَوْ أَفْضَلْ في الطَّريق ليكي ؟

لَوْ أَوْصَلْ بيكي للآخِر

وليه يِبْقا احْتِمال قُرْبِكْ؟

وبُعْدِكْ يِبْقا ليه لازِم ؟ عَذابْ قَلْبُه بِيِقْتِلْني

وساعاتْ الموت يِكونْ ناعم !

"يا كُلْ العُمْر فات الوَقْت هِيَّه الإسم عَـ الخاتم

وانا الذنب اِللِّي فِـ ضُلوعَـكو

انا التُوبَهْ فـِ ضُلوعْ نادِم

وانا حَرْف الأَلِفْ في نِهايِةْ الكِلْمَه

وِفِي القِسْمَه

مفيشْ لازِم !!

هَتِنْساني

وهَقْدَرْ عَـ الطَّريق بَعْدَك

دانا صَدَّقْني مِن أَبْعَدْ مَكان عنَّدَك"

صَرَخْ : إِنْتي؟ ؟

دا بِينَّا يا دُوبُه شِبْر وِنُصْ لَوْ زادْ يِبْقا كَام سانْتي ؟

مَنيش جَمْبَك

ومُشْ مُمْكِنْ هَكونْ جَمْبَكْ

أَنا الصُّوره اللِّي وِقْعِتْ من حَيطانْ قَلْبَكْ

وانا كُلّ اللّي بيه هَتْخونوهَيْخونَكْ

عَشان حَبَّك

أنا همك

أنا جرحكْ

كِدِبْتْ عَليه

عَشان شُفْتِ الهَوان عَلى قَلْبي بِيْعافـِرْ فِـ دَمْعِ عِـنيه

ومَتْعِبْتِشْ في تِصْديقُه

و بَلع رِيقُــه

وِصَدَّق كِدْبِتي وِعَلَّقْ عَلَى كِــتافْ النَّـصيبْ ضيقُـه

وِراحْ ماشي !!!

كويت العز

اليومين الجايين25و26فبراير العيد الوطني وعيد التحرير في الكويت...بلدي التانيه ويمكن الاولى كمان عشت فيها اكتر من تلت تربع عمري॥18سنة من23 كتير اوي...بلد هاديه ورايقه وكريمه وطيبه ...حبيت الكويت يمكن لاني وعيت فيها او يمكن لانها فعلا تتحب ...عشت فيها عمري كله وطفولتي وشبابي وصحابي ومعارفي والمدرسه والبنات والتعليم والاسواق والعادات والتقاليد والطباع والمعامله ...بحس كتير اوي اني كويتيه يمكن مبعرفش اتكلم كويتي بس اكيد بافهمهم :) اتعرفت على احلى صحبه واحلى ناس ومن كل البلاد العربيه مصريين وكوايته وسعوديين وسوريين ولبنانيين وبحرينيين وعراقيين وبدون والبدون دول ناس كانو عايشين في الصحرا ومش معاهم اوراق اصلا مشعارفين هما من اي بلد وسعات بيكونو عارفين هما منين ومخبيين ورقهم عشان يتجنسو ويبقو كوايته ويتمتعو بمميزات اهل البلد البلد الوحيده اللي لقيت فيها الجنسيه درجات درجه اولى وتانيه :) الكويت ...بلد عز بجد مش متهانين ولا متداسين ولا مكفيين على وشنا عشان نلاقي اكل العيش اكيد في نفئات كتير متهانه هناك ومتاكل حقها اكيد بس مش زي هنا...هناك في ادميه شويه في التعامل..وبجد ناس طيبه اوي...بحب اروح هناك بحس براحه نفسيه وبهدووء ...متعوده عليها كبلد مبحسش اني غريبه او حتى زايره انا من اهل البلد دي..البلد اللي ذاكرت تاريخها وحفظته واتعلمته ..... اعياد الخير يا كويت...واجازه سعيده لكل اللي هناك....حبيت اهنيهم واقولها..شكرا على كل اللي عملتيه عشاني...وشكرا على كل الذكريات والصحاب والاماكن والدراسه والمدرسه والعالم اللي عشته :) بحبك يا كويت

أنا..غير

بحبه اوي..

واحشني اوي..

بيتقالو من ناس كتير..

لكن مني انا..

طبعا...غير

ماهو مش اي بحبك..

تتحس..

ولا كل بحبك..

تدخل قلبك انت وبس

ولما بقوله ازيك..

تبقى بجد..إزيك؟

مش زي الناس..

خبارك والزي الصحة

عمرها قالت..ماشي الحال؟؟

زي حروفي ما بتقولها؟

طبعا لأ..أصل انا عارفه عيون

بتغني ازاي..وتقوله بحبك

غير كووول بحبك في الدنيا

وأنا عارفه كفوفي لما تسلم

إزاي بتقوله بجد...بحبك جد

مهيش تزويق ولا حشو كلام

بحبك يعني:

بكل

حروفي

بقيت محتل

كياني

بشرية الطباع...ولكن انسانة

هو الواحد لما بيسكت يبقى مقر بالخطأ؟؟ يعني لما نتخانق ولا نختلف مينفعش الواحد يسكت؟ لازم ندخل خناقه ونخربش ونجرح ونتعارك ونشد في شعور بعض؟؟ مينفعش نبعد بكرامه وشويه ملامح حلوة فاكرينها؟؟ هو عشان سكت وبعدت ابقى مفتريه وظالمه ؟؟ ديما باعاتب وبقول ليه ونتصالح ونتكلم....بس في ناس...وفي علاقات مبينفعش فيها كده..لانها بتكون اكبر من العتاب والمصالحه...

وخصوصا لما تكون قرارات مصيرية...كنت ديما بقول اول ما حد يكسر جوايا حاجه اعرف اننا مينفعش لا نكون صحاب ولا اخوات ولا احباب ولا حتى معارف...لاني عارفه نفسي مبنساش الكسر॥ممكن انسى شويه اهمال ولا شويه انشغال ولا حتى شوية قسوه لكن الكسر مبنسهوش منيش ملاك عارفه نفسي...بس عارفه اكتر اني عمري في حياتي ماظلمت حد لاني ديما وابدا بفوت وبعدي ولما بحس اني هكره حد او هظلمه بقولهاله في وشه انا كرهتك...عملتها مره في ثانوي وفرجت الناس عليا في المدرسه وقلتها لوحده صاحبتي انا بكرهك...وهافضل طول عمري اكرهك...ولوعشت اد عمري عمرين هكرهك برضو...إيه الغل دا؟؟ معرفش بس انا قلتهالها في وشها ومخبتش عليها ومخدعتهاش وماتكلمتش عليها من وراها ومخبتش عليها واتصلت بيا في عيد ميلادي تقولي كل سنه وانتي طيبه وعارفه انك كرهاني حسيت اني وحشه اوي بس انا كده محدش كامل...ولاني اديتها فرص كتير اوي وكانت كل مره بتخذلن...وكل مره بتصدمني وبتجبرني اسامح....قررت ابعد عنها وانا لسه فكرالها حاجات حلوة عشان كل ما كنت باعقد معاها كنت بكرهها زياده او على الاقل حبها في قلبي بيقل...واتعلمت في حياتي كلها اني ما اكتمش جوايا عشان ما اعاملش الناس بوشين مع انو سعات بيبيني مفتريه اوي بس بحاول :):)

اكتر حاجه بتوجعني بقى اني ما اتقدّرش..يعني الواحد يصبر ويتعب وبرضو يتقال عليه بايع وغشاش ومخادق وقلبك حجر॥على رأي اصاله...يعني الواحد هيجي يبيع في موقف شده ولا موقف صعب انما في وسط الحياه كده والدنيا ماشيه ونيجي نقول استوب اكيد في سبب واكيد بنقف عشان البنزين خلص...ومش قادرين نكمل ولا نستحمل مع كل الضغط وقله التقدير لان اللي بيخلي الواحد يبقى على صحابه انهم بيدوله مساحه من الامل والحب والاهتمام اللي يحسسنا اننا اهم حاجه في الدنيا...

بكره افتح جروح قدي...وبكره اكتر انها تتفتح غلط...وبخناقه كمان :):)

وتتفتح عشان تتلوث وتتجرح اكتر॥ما انا كنت ساكته وراضيه ومفيش جدي داتقال يبقى بيتفتح ليه؟؟!

مش عارفه جملها شفتها في نك نيم حد على الماسنجر عندي : في الحب لا تفرط في من يشتريك ولا تشتري من باعك

وفي الحياه عموما كده الصحاب والجيران والمعارف وحتى زمايل الكلية

كلاكيت تاني مرة...

مدونتيي رااااحت

معرفش راحت فين !!!

بجد كان موقف غريييب جدااااا.....المدونه اختفت ...وملقتنيش...حسيت شعور غريب اوي انا فين؟؟ كل اللي اتكتب راح فين والدرفتس اللي منشرتهاش واللي كتباها بنفسي راحت فين؟؟ والحاجات اللي اتنشرت والردود مع انها يعني مش كتابات فذه بس هي دي انا...زعلت جدا عليها وعلى نفسي وحسيت احساس قابض وقلت ياساتر يارب...المدونه اختفت وعمو نصر صاحبنا الرائع توفى ربنا يرحمه ويدخله جنته ويثبته عند السؤال....وانا داخله المستشفى مش عارفه هخرج ولا لأ...كان عندي شعور قوي اني مش هاخرج...بس مؤقتا...لسه عايشه...

هارجع اكتب تاني...واحاول انزل حاجات منزلتهاش مع ان ملهاش لزمه احسن تطير هي كمان...بس حبيت ابدأ من جديد

عشان مبحبش الفشل....بسم الله نبدأ...تاني